Angelo Poliziano -Elegiae (1)

Проект Belpaese2000 BIBLIO ITALIA Библиотека итальянской литературы

Biblio Italia

Язык

Перевод

Италия

Политика

Живопись

Кино

Музыка

Театр

Гостевая

Angelo Poliziano

Elegiae

	ad Laurentium Medicem.
	commendat praeceptorem Andronicum

	Ipse canenda geris, Laurens, nos gesta canemus;
	Hei mihi, sed nostro est paruus in ore sonus!
	Exsuperat teneras, Medicos, tua gloria uires,
	Nostraque materiam carmine musa premit.
5	At tenerae crescent uires crescentibus annis,
	Exiguusque meo crescet in ore sonus.
	Tum liceat nomen fama tibi ferre per aeuum
	Et tua non humili gesta sonare tuba.
	Tu tantum Andronicum serues! O quantus ab illo
10	Spiritus in nostri pectoris ima uenit!
	O quos ille tibi gignit nutritque poetas,
	Dum tonat argolicis troica bella modis!
	Iam tibi Aristotelem uertit, penitusque retrusas
	Naturae arcano concinit ore uices.
15	Vnica materies illi es, spes unica solus;
	Vna illi uitam tu dare uoce potes.
	Parua petit, dare magna soles; da parua penitenti:
	Parua tamen nescis si dare, magna date.